Offerynnau Statudol
Y GWASANAETH IECHYD GWLADOL, CYMRU
Gwnaed
28 Mawrth 2008
Yn dod i rym
1 Ebrill 2008
Mae Gweinidogion Cymru drwy arfer y pwerau a roddwyd gan adran 203(9) a (10) o Ddeddf y Gwasanaeth Iechyd Gwladol (Cymru) 2006 a pharagraff 29 o Atodlen 3 iddi(1) ac ar ôl cwblhau'r ymgynghori statudol fel y'i rhagnodwyd o dan baragraff 29(4) o Atodlen 3 i'r Ddeddf honno(2), drwy hyn yn gwneud y Gorchymyn hwn.
1.—(1) Enw'r Gorchymyn hwn yw Gorchymyn Ymddiriedolaeth Gwasanaeth Iechyd Gwladol Pontypridd a Rhondda (Trosglwyddo Staff, Eiddo, Hawliau a Rhwymedigaethau) 2008 a daw i rym ar 1 Ebrill 2008.
(2) Yn y Gorchymyn hwn, onid yw'r cyd-destun yn mynnu fel arall;
ystyr “y dyddiad trosglwyddo” (“the transfer date”) yw 1 Ebrill 2008;
ystyr “yr hen ymddiriedolaeth” (“the old trust”) yw Ymddiriedolaeth Gwasanaeth Iechyd Gwladol Pontypridd a Rhondda a sefydlwyd ar 4 Ionawr 1999;
ystyr “yr ymddiriedolaeth newydd” (“the new trust”) yw Ymddiriedolaeth Gwasanaeth Iechyd Gwladol Cwm Taf a sefydlwyd ar 12 Mawrth 2008.
2.—(1) Yn ddarostyngedig i baragraff (3), trosglwyddir contract cyflogaeth unrhyw berson a oedd yn union cyn y dyddiad trosglwyddo yn cael ei gyflogi gan yr hen ymddiriedolaeth i'r ymddiriedolaeth newydd ar y dyddiad trosglwyddo a bydd y contract hwnnw'n effeithiol fel pe bai wedi'i wneud yn wreiddiol rhwng y person a gyflogir felly a'r ymddiriedolaeth newydd.
(2) Heb ragfarnu paragraff (1) uchod —
(a) yn rhinwedd yr erthygl hon, trosglwyddir yr holl hawliau, pwerau, dyletswyddau a rhwymedigaethau o dan gontract neu mewn cysylltiad â chontract y mae'r paragraff hwnnw'n gymwys iddo i'r ymddiriedolaeth newydd ar y dyddiad trosglwyddo;
(b) bernir bod unrhyw beth a wnaed cyn y dyddiad hwnnw gan yr hen ymddiriedolaeth neu mewn perthynas â hi ynglŷn â'r contract hwnnw neu'r cyflogai hwnnw, o'r dyddiad trosglwyddo ymlaen wedi'i wneud gan yr ymddiriedolaeth newydd neu mewn perthynas â hi.
(3) Nid yw paragraffau (2) a (3) uchod yn rhagfarnu unrhyw hawl sydd gan unrhyw gyflogai i derfynu ei gontract cyflogaeth os gwneir newid sylweddol er niwed i'r cyflogai yn ei amodau gwaith, ond ni fydd unrhyw hawl o'r fath yn codi yn unig oherwydd y newid mewn cyflogwr a bernir gan yr erthygl hon.
3. Ar y dyddiad trosglwyddo trosglwyddir holl eiddo, hawliau a rhwymedigaethau'r hen ymddiriedolaeth, sydd heb eu crybwyll yn erthygl 2 uchod, i'r ymddiriedolaeth newydd gan gynnwys heb gyfyngiad—
(a) Y ddyletswydd i baratoi'r cyfrifon sydd heb eu cwblhau gan yr hen ymddiriedolaeth a chyflawni'r holl ddyletswyddau statudol mewn perthynas â'r cyfrifon hynny;
(b) Eiddo ymddiriedol yr hen ymddiriedolaeth a restrir yn Atodlen 1.
(c) Elusennau'r hen ymddiriedolaeth a restrir yn Atodlen 2.
4. Trosglwyddir holl swyddogaethau'r hen ymddiriedolaeth i'r ymddiriedolaeth newydd a byddant yn cael effaith o'r dyddiad trosglwyddo ymlaen.
Edwina Hart
Y Gweinidog dros Iechyd a Gwasanaethau Cymdeithasol, un o Weinidogion Cymru
28 Mawrth 2008
Erthygl 3(b)
| Eiddo | Deiliadaeth | Rhif Teitl os yw'n gymwys |
|---|---|---|
| Ymddiriedolaeth Gwasanaeth Iechyd Gwladol Pontypridd a Rhondda | ||
| Ysbyty | ||
| Brenhinol Morgannwg | Rhydd-ddaliad | WA631383 WA630843 WA962482 CYM46243 |
| Dewi Sant | Rhydd-ddaliad | WA745331 |
| Llwynypia | Rhydd-ddaliad | WA751195 |
| Ysbyty George Thomas | Rhydd-ddaliad | WA523391 WA523398 |
| Pontypridd a'r Cylch | Rhydd-ddaliad | WA744920 |
| Ysbyty Cwm Rhondda | Rhydd-ddaliad | CYM69858 CYM47332 WA272586 |
| Clinigau/ Canolfannau Iechyd | ||
| Canolfan Iechyd Tonypandy | Rhydd-ddaliad | WA744914 |
| Clinig Carnegie | Rhydd-ddaliad | WA744912 |
| Clinig Pen-y-graig | Rhydd-ddaliad | WA744916 |
| Clinig Ynys-wen | Rhydd-ddaliad | WA744097 |
| Clinig Ystrad | Rhydd-ddaliad | WA214554 |
| Canolfan Iechyd Gilfach Goch | Rhydd-ddaliad | WA297230 |
| Clinig Llwyn yr Eos | Rhydd-ddaliad | WA157863 |
| Canolfan Iechyd Pontypridd | Rhydd-ddaliad | WA744918 |
| Canolfan Iechyd Talbot Green | Rhydd-ddaliad | WA570953 |
| Clinig Tonyrefail | Rhydd-ddaliad | WA744913 |
| Canolfan Iechyd Tylorstown | Rhydd-ddaliad | WA466082 WA559467 |
| Canolfan Adnoddau | Rhydd-ddaliad | WA770734 |
| Iechyd Meddwl Trealaw | WA730588 | |
| Canolfan Adnoddau | Rhydd-ddaliad | WA337585 |
| Iechyd Meddwl Maritime | WA504867 | |
| Arall | ||
| Uned Brosesu Ganolog, Treorci | Lesddaliad | |
| Unedau 20, 21 a 22 Ystâd ddiwydiannol Caemawr, Treorci, CF42 6EQ | Lesddaliad | |
| Golchdy a Mannau Cysylltiedig ar safle blaenorol Ysbyty Dwyrain Morgannwg | Rhydd-ddaliad | WA960091 WA745335 |
| Safle Blaenorol Ysbyty Tonteg | Rhydd-ddaliad | WA744919 |
| 11 Cedar Wood Drive, Tonyrefail, CF37 8JB | Rhydd-ddaliad | CYM13913 |
| 6 Mayfield Place, Llantrisant, CF72 8QG | Rhydd-ddaliad | CYM63433 |
Erthygl 3(c)
Cronfa Elusennol Gyffredinol Ymddiriedolaeth GIG Pontypridd a Rhondda (gan gynnwys is-elusennau) —Rhif 1049765
(Nid yw'r nodyn hwn yn rhan o'r Gorchymyn)
Mae'r Gorchymyn hwn yn darparu ar gyfer trosglwyddo staff o Ymddiriedolaeth Gwasanaeth Iechyd Gwladol Pontypridd a Rhondda i Ymddiriedolaeth Gwasanaeth Iechyd Gwladol Cwm Taf o 1 Ebrill 2008 ymlaen.
Mae'r Gorchymyn hwn hefyd yn darparu ar gyfer trosglwyddo holl eiddo, hawliau a rhwymedigaethau Ymddiriedolaeth Gwasanaeth Iechyd Gwladol Pontypridd a Rhondda i Ymddiriedolaeth Gwasanaeth Iechyd Gwladol Cwm Taf ar 1 Ebrill 2008.