Office of Public Sector Information
(Nid yw'r nodyn hwn yn rhan o'r Rheoliadau)
Mae'r Rheoliadau hyn yn diwygio Rheoliadau Addysg (Benthyciadau i Fyfyrwyr) (Ad-dalu) 2000 (O.S. 2000/944) (“y prif Reoliadau”).
O dan adran 44 o Ddeddf Addysg Uwch 2004 trosglwyddwyd rhai o swyddogaethau'r Ysgrifennydd Gwladol yn ymwneud â chymorth i fyfyrwyr o dan adran 22 o Ddeddf Addysgu ac Addysg Uwch 1998 i Weinidogion Cymru.
Mae rheoliad 3 yn mewnosod yn rheoliad 2 o'r prif Reoliadau baragraffau newydd i'r perwyl bod unrhyw gyfeiriad mewn unrhyw ddarpariaeth yn Rhan 1 neu Ran 2 o'r prif Reoliadau i'w ddarllen, mewn perthynas â benthyciadau i fyfyrwyr a wneir gan Weinidogion Cymru, fel cyfeiriad at Weinidogion Cymru.
Mae rheoliad 4 yn diwygio'r diffiniad o “Secretary of State” yn rheoliad 3 o'r prif Reoliadau.
Mae rheoliad 5 yn mewnosod diffiniad newydd yn rheoliad 9 o'r prif Reoliadau.
Mae rheoliad 6 yn mewnosod rheoliad 12 newydd yn y prif Reoliadau o ran Cymru. Mae Gweinidogion Cymru'n dileu rhwymedigaeth benthyciwr i ad-dalu ei fenthyciad i fyfyriwr mewn amgylchiadau penodol. Caiff y benthyciad ei ddileu os bydd farw'r benthyciwr, os bydd y benthyciwr yn cyrraedd 65 oed, neu os bydd y benthyciwr yn derbyn budd-dal ar sail anabledd a'i fod, o ganlyniad i'r anabledd, yn an-ffit yn barhaol i weithio. Bydd categorïau penodol o fenthycwyr a gymerodd fenthyciadau ar gyfer cyrsiau yn dechrau ar neu ar ôl 1 Medi 2006 yn gweld dileu eu benthyciadau i fyfyrwyr 25 o flynyddoedd ar ôl iddynt ddod yn atebol am eu had-dalu. Bydd benthyciadau'r benthycwyr sy'n weddill yn cael eu dileu pan fydd y benthycwyr yn cyrraedd 65 mlwydd oed.
Mae rheoliad 7 yn rhoi Rhan 5 newydd yn y prif Reoliadau, gan fewnosod rheoliadau 53 i 57C newydd o ran Cymru. Mae'r Rhan hon yn ymwneud ag ad-dalu benthyciadau i fyfyrwyr gan fenthycwyr sy'n mynd dramor i fyw yn dilyn eu cyrsiau addysg uwch. Mae'n ddyletswydd ar fenthycwyr i hysbysu Gweinidogion Cymru pan fyddant yn mynd dramor i fyw am gyfnod o fwy na thri mis. Rhaid iddynt hefyd ddarparu gwybodaeth am eu hincwm (rheoliad 54 o'r prif Reoliadau).
Pan fydd benthyciwr yn mynd dramor i fyw, caiff Gweinidogion Cymru gyflwyno iddo hysbysiad yn ei gwneud yn ofynnol iddo ad-dalu ei fenthyciad yn unol â'r prif Reoliadau. Yn y cyfryw hysbysiad, caiff Gweinidogion Cymru ei gwneud yn ofynnol i'r benthyciwr sydd wedi methu â darparu ar eu cyfer wybodaeth y mae ei hangen o dan reoliad 54 o'r prif Reoliadau wneud ad-daliad i ostwng y swm sy'n weddill o'i fenthyciad fel bod y swm yn cyfateb i swm a fyddai ar ôl i'w dalu pe bai'r benthyciwr wedi darparu'r wybodaeth.
Bydd yn ofynnol i fenthycwyr ad-dalu eu benthyciadau drwy randaliadau penodol o dan reoliad 56 o'r prif Reoliadau, onid yw rheoliad 57 yn gymwys. Bydd yn rhaid iddynt ad-dalu, bob mis, randaliad penodol a fydd yn cael ei gyfrifo yn unol â rheoliad 57A.
O dan reoliad 57 o'r prif Reoliadau caiff benthyciwr sydd wedi cydymffurfio â chais am roi gwybodaeth ad-dalu ei fenthyciad am gyfnod o 12 mis mewn 12 rhandaliad ar sail ei incwm. Rhandaliad ydyw sy'n un rhan o ddeuddeg o 9% o incwm gros y benthyciwr o ddiystyru incwm hyd at drothwy cymwys, ac unrhyw incwm y bydd y benthyciwr yn gwneud ad-daliadau ar fenthyciad mewn cysylltiad ag ef drwy system drethi'r DU. Ar ddiwedd y cyfnod o 12 mis, gellir ailasesu ad-daliadau'r benthyciwr, neu gall y benthyciwr ad-dalu yn unol â rheoliadau 56 a 57. Caiff y benthyciwr hefyd ofyn am i'r rhandaliadau ar sail ei incwm gael eu hailbenderfynu yn ystod y cyfnod o 12 mis.
Mae rheoliad 57A yn nodi sut y cyfrifir y trothwy cymwys a'r rhandaliadau penodol. Cyfrifir y rhain drwy gyfeirio at fynegai lefel prisiau'r wlad y mae'r benthyciwr yn preswylio ynddi. Cyfrifir y mynegai lefel prisiau ar gyfer y wlad honno drwy ddefnyddio'r mynegeion lefel prisiau cymharol dros dro diweddaraf wedi eu mesur fel cynnyrch domestig gros a lunnir gan Swyddfa Ystadegau y Cymunedau Ewropeaidd (“Eurostat”). Ceir y trothwy cymwys a'r rhandaliad penodol ar gyfer pob un o gyfres o fandiau o fynegeion lefel prisiau mewn tabl yn rheoliad 57A. Pan nad oes unrhyw ddata ar gael gan Eurostat, bydd data Banc y Byd yn cael ei ddefnyddio. Os nad oes unrhyw ddata mewn cysylltiad â gwlad ar gael gan Fanc y Byd, bydd y trothwy cymwys a'r rhandaliad penodol ar gyfer band A yn gymwys.
Mae rheoliad 57B yn darparu i fenthycwyr sy'n dychwelyd i fyw i'r Deyrnas Unedig roi'r gorau i wneud ad-daliadau o dan y rhan hon o'r Rheoliadau.
Mae rheoliad 57C yn darparu y caiff Gweinidogion Cymru ei gwneud yn ofynnol i fenthyciwr ad-dalu'r cyfan o'i fenthyciad os yw'n fenthyciwr sy'n peidio ag ad-dalu.
