Office of Public Sector Information
(Nid yw'r nodyn hwn yn rhan o'r Rheoliadau)
Mae'r Rheoliadau hyn yn diwygio Rheoliadau Awdurdodau Lleol (Cyllid Cyfalaf a Chyfrifyddu) (Cymru) 2003 (“Rheoliadau 2003”) ac maent yn gymwys o ran awdurdodau lleol yng Nghymru.
Mae rheoliad 3 yn mewnosod yn Rheoliadau 2003 reoliad newydd, sef rheoliad 24A, sydd i'w ddirymu ar 1 Ebrill 2011. Mae'r rheoliad newydd yn darparu nad oes angen i awdurdod lleol, hyd onid yw'n gorfod talu'r swm hwnnw i'r swyddog neu i'r cyflogai, godi ar gyfrif refeniw swm mewn cysylltiad â thaliad sydd i'w wneud i swyddog neu i gyflogai am waith a wnaed yn y gorffennol ac y cafodd y swyddog neu'r cyflogai dâl anghyfartal amdano.
Mae rheoliad 4 yn mewnosod yn Rheoliadau 2003 reoliadau newydd, sef rheoliadau 24B i 24D. Mae rheoliadau 24B a 24C yn gwneud darpariaeth ar gyfer y swm y mae'n rhaid i awdurdod lleol ei godi ar gyfrif refeniw neu ei gredydu i gyfrif refeniw mewn cysylltiad â phremiwm neu ddisgownt sy'n deillio o ad-dalu benthyciad yn gynnar gan yr awdurdod. Mae rheoliad 24D yn ei gwneud yn ofynnol i awdurdod lleol sydd wedi rhoi benthyciad i berson gredydu i gyfrif refeniw yr awdurdod cyfanswm y llog y mae i'w dderbyn ym mhob blwyddyn ariannol yn unol â'r cytundeb benthyciad ar gyfer y benthyciad hwnnw.
Mae arfarniad rheoliadol wedi'i baratoi mewn cysylltiad â'r Rheoliadau hyn ac mae ar gael gan yr Is-adran Cyllid Llywodraeth Leol, yr Adran Llywodraeth Leol a Diwylliant, Cynulliad Cenedlaethol Cymru, Parc Cathays, Caerdydd CF10 3NQ (Rhif ffôn 02920825111; e-bost : LGF3L@wales.gsi.gov.uk).
