Office of Public Sector Information
(Nid yw'r nodyn hwn yn rhan o'r Rheoliadau)
Mae'r Rheoliadau hyn yn gwneud diwygiadau i'r setiau canlynol o Reoliadau:
1. Rheoliadau'r Gwasanaeth Iechyd Gwladol (Ffioedd am Gyffuriau a Chyfarpar) (Cymru) 2001 (“y Rheoliadau Ffioedd am Gyffuriau a Chyfarpar”);
2. Rheoliadau'r Gwasanaeth Iechyd Gwladol (Gwasanaethau Fferyllol) 1992 (“y Rheoliadau Gwasanaethau Fferyllol”); a
3. Rheoliadau'r Gwasanaeth Iechyd Gwladol (Contractau Gwasanaethau Meddygol Cyffredinol) (Cymru) 2004 (“y Rheoliadau Contractau GMS”).
Mae angen y newidiadau o ganlyniad i ychwanegu dau gategori newydd o ragnodwyr at Orchymyn Meddyginiaethau drwy Bresgripsiwn yn Unig (I'w Defnyddio gan Bobl) 1997 (“y Gorchymyn POM”).
Y ddau gategori newydd yw: nyrsys-ragnodwyr annibynnol a fferyllwyr-ragnodwyr annibynnol.
Caiff nyrsys-ragnodwyr annibynnol ragnodi'n unol ag Erthygl 3A o'r Gorchymyn POM. Caiff fferyllwyr-ragnodwyr annibynnol ragnodi'n unol ag Erthygl 3B(2)(c) o'r Gorchymyn POM.
Mae'r Rheoliadau hyn yn darparu y bydd nyrs yng Nghymru, sydd wedi'i chofrestru yn y Gofrestr Nyrsio a Bydwreigiaeth, yn gallu rhagnodi fel nyrs-ragnodydd annibynnol pan fydd wedi llwyddo mewn cwrs a achredwyd. Bydd fferyllydd yn gallu rhagnodi fel fferyllydd-ragnodydd annibynnol ar yr amod y bydd y gofrestr fferyllol berthnasol yn dangos ei fod wedi cymhwyso i archebu cyffuriau, meddyginiaethau a chyfarpar fel fferyllydd-ragnodydd annibynnol.
Mae'r Rheoliadau hyn hefyd yn diweddaru'r diffiniad o “supplementary prescriber” a geir yn y Rheoliadau Gwasanaethau Fferyllol a “rhagnodydd atodol” a geir yn y Rheoliadau Ffioedd am Gyffuriau a Chyfarpar i gynnwys optometryddion. Mae optometryddion eisoes yn gynwysedig yn y diffiniad o ragnodydd atodol yn y Rheoliadau Contractau GMS Cymru.
Mae'r Rheoliadau hyn hefyd yn diweddaru'r diffiniad o “nyrs sy'n rhagnodi'n annibynnol”.
