Mae adran 72 ac Atodlen 9 yn diwygio Deddf Dysgu a Medrau 2000 er mwyn galluogi Cyngor Cenedlaethol Cymru dros Addysg a Hyfforddiant i gynnig sefydlu, addasu neu gau dosbarthiadau chwech. Mae ei gynigion i'w cyflwyno i Gynulliad Cenedlaethol Cymru ("y Cynulliad Cenedlaethol"). Nodir y gweithdrefnau mewn rheoliadau.

Mae effaith y darpariaethau a bennir yn Rhan 2 o'r Atodlen fel a ganlyn  - 

Mae adrannau 21, 22, 30 a 32 yn ailddeddfu darpariaethau penodol yn Neddf Safonau a Fframwaith Ysgolion 1998 ("Deddf 1998") ynglŵn â llywodraethu ysgolion a gynhelir.

Mae adran 21 yn darparu mai corff llywodraethu ysgol sy'n gyfrifol am ei rhedeg. Mae'n galluogi'r Cynulliad Cenedlaethol i wneud rheoliadau sy'n nodi rolau a chyfrifoldebau cyrff llywodraethu, penaethiaid ac AALl.

Mae adran 22 yn darparu bod rhaid i AALl ddarparu gwybodaeth a hyfforddiant yn rhad ac am ddim i lywodraethwyr.

O dan adran 30 rhaid i gorff llywodraethu baratoi adroddiad blynyddol. Bydd y rheoliadau a wneir gan y Cynulliad Cenedlaethol yn nodi'r gofynion ynglŵn â chynnwys adroddiadau blynyddol a'u dosbarthu. Rhaid i gyrff llywodraethu ddarparu adroddiadau o'r fath i'r AALl yn unol â'i ofynion, a rhaid i benaethiaid ddarparu adroddiadau o'r fath i gyrff llywodraethu neu AALl yn unol â'u gofynion hwythau.

Mae adran 32 yn nodi, o ran gwahanol gategorïau o ysgol, y corff sy'n gyfrifol am benderfynu dyddiadau tymhorau ysgol, gwyliau ysgol ac amserau sesiynau ysgol. Caiff y Cynulliad Cenedlaethol wneud rheoliadau ynglŵn â chynigion i newid amserau sesiynau ysgol.

Mae adran 39 yn cynnwys diffiniadau.

Mae adran 155 ac Atodlen 14 yn diwygio Atodlen 26 i Ddeddf 1998 sy'n gwneud darpariaeth ynglŵn ag arolygu addysg feithrin. Bydd y diwygiadau hyn yn caniatáu i arolygiadau gael eu gwneud gan aelodau o'r arolygiaeth yn ogystal ag arolygwyr meithrinfyedd cofrestredig, ac yn caniatáu i Brif Arolygydd Ei Mawrhydi dros Addysg a Hyfforddiant yng Nghymru gofrestru'r personau hynny y mae hi'n barnu eu bod yn briodol a chymryd i ystyriaeth yr angen am arolygwyr yng Nghymru. O'r blaen cofrestrodd hi unrhyw berson a fodlonodd y meini prawf statudol. Mae Atodlen 14 yn cynnwys diwygiadau hefyd a fydd yn golygu y bydd apelau yn erbyn penderfyniadau ar gofrestru yn cael eu gwneud yn Lloegr i'r tribiwnlys a sefydlwyd o dan adran 9 o Ddeddf Amddiffyn Plant 1999. Bydd apelau yng Nghymru yn parhau i gael eu gwneud i Dribiwnlys yr Arolygydd Meithrinfeydd Cofrestredig, ond mae rhai diwygiadau sy'n ganlyniad i'r newidiadau yn Lloegr.

Mae adran 176 yn gosod dyletswydd ar AALl a chyrff llywodraethu i roi sylw i ganllawiau'r Cynulliad Cenedlaethol ynglŵn ag ymgynghori â disgyblion ynghylch gwneud penderfyniadau sy'n effeithio arnynt.